फिरोज सिकलकर:-
शिरूर (जिल्हा – पुणे) – सरसेनापती हंबीरराव मोहिते राष्ट्रीय प्रतिष्ठान, पुणे आणि रामलिंग महिला उन्नती बहुउद्देशीय सामाजिक संस्था, रामलिंग, शिरूर यांच्या संयुक्त विद्यमाने हिंदवी स्वराज्याचे पराक्रमी सेनापती सरसेनापती हंबीरराव मोहिते यांच्या पुण्यतिथीनिमित्त तसेच स्वराज सौदामिनी छत्रपती महाराणी ताराबाई यांच्या पुण्यतिथीनिमित्त ऐतिहासिक राष्ट्रगौरव शौर्य पुरस्कार सोहळा मोठ्या उत्साहात पार पडला.
शिरूर शहरातील बाबुरावनगर परिसरातील ज्ञानगंगा विश्व विद्यालयात हा भव्य कार्यक्रम आयोजित करण्यात आला होता. स्वराज्याच्या इतिहासातील शौर्य, त्याग आणि राष्ट्रनिष्ठेचे स्मरण करणारा हा सोहळा उपस्थितांसाठी प्रेरणादायी ठरला.
या कार्यक्रमात प्रसिद्ध व्याख्यात्या अर्चना भोर यांनी “हंबीरराव मोहिते यांची कन्या मी ताराराणी बोलते” या विषयावर प्रभावी आणि अभ्यासपूर्ण व्याख्यान सादर केले. त्यांच्या व्याख्यानातून छत्रपती महाराणी ताराबाई यांचे शौर्य, नेतृत्वगुण, राजकीय दूरदृष्टी तसेच स्वराज्य रक्षणासाठी त्यांनी दिलेले अमूल्य योगदान प्रभावीपणे उलगडले गेले. उपस्थित श्रोते व्याख्यानाने मंत्रमुग्ध झाले.
या पुरस्कार सोहळ्यात विविध क्षेत्रात उल्लेखनीय कार्य करणाऱ्या मान्यवरांना राष्ट्रगौरव शौर्य पुरस्कार प्रदान करण्यात आले. पुरस्कारप्राप्त मान्यवर पुढीलप्रमाणे —
प्रा. डॉ. राजेराम प्रभू घावटे – राष्ट्रीय उद्योगरत्न पुरस्कार,
अर्चना भोर – आदर्श महिला व्याख्यात्या पुरस्कार,
निलेश काळे – राष्ट्रीय सोशल मीडिया इन्फ्लूएंसर पुरस्कार,
डॉ. सुनीता पोटे – राष्ट्रीय आरोग्य दूत पुरस्कार,
संजयराव शितोळे – शिक्षण महर्षी राष्ट्रगौरव पुरस्कार,
तृप्ती सरोदे – आदर्श समाजसेविका पुरस्कार,
भाऊसाहेब दहिफळे – तालुकास्तरीय प्रेरणा पुरस्कार.
कार्यक्रमासाठी प्रमुख पाहुणे म्हणून राजेंद्र ऊर्फ संग्रामसिंह मोहिते पाटील (अध्यक्ष, सरसेनापती हंबीरराव मोहिते राष्ट्रीय प्रतिष्ठान, पुणे), कुणालदादा मालुसरे (वंशज सुभेदार तानाजी मालुसरे), दिपकराजे शिर्के (वंशज महाराणी येसूबाई), अमितदादा गाडे (दूधमाता धाराऊ यांचे वंशज), सचिन दादा भोसले पाटील नागपूरकर, महेंद्रजी नवले (गावगाडा इतिहास अभ्यासक), शुभम मोहिते, आदित्य मोहिते, सचिन मोहिते (वंशज सरसेनापती हंबीरराव मोहिते), खालीलभाई शेख (सुप्रसिद्ध शिवव्याख्याते) आदी मान्यवर उपस्थित होते.
कार्यक्रमाचे प्रास्ताविक अश्विनी उर्फ राणीताई कर्डीले यांनी केले. यावेळी शिरूर पोलीस स्टेशनचे पोलीस निरीक्षक संदीप केंजळे, पत्रकार तेजस फडके (दैनिक प्रभात), ॲड. बाबुशेठ मोरे (सर्वेसर्वा : सोनाई मार्केट), अजय गायकवाड, बच्चूभाऊ गव्हाणे (राष्ट्रवादी शरद पवार गट – शिरूर तालुका युवा अध्यक्ष) यांच्यासह विविध क्षेत्रातील मान्यवर उपस्थित होते.
कार्यक्रमाचे सूत्रसंचालन रावसाहेब चक्रे यांनी केले, तर समारोपप्रसंगी श्यामकांत वर्पे यांनी उपस्थितांचे आभार मानले.
यावेळी अध्यक्ष राजेंद्र ऊर्फ संग्रामसिंह मोहिते पाटील म्हणाले, “सरसेनापती हंबीरराव मोहिते आणि महाराणी ताराबाई यांच्या पुण्यतिथीनिमित्त दिले जाणारे पुरस्कार चार भिंतीतील सभागृहात न ठेवता चार ते पाच हजार विद्यार्थीसंख्या असलेल्या महाविद्यालयात घेण्यामागचा उद्देश एकच आहे. या महान व्यक्तिमत्त्वांचे संस्कार विद्यार्थ्यांच्या मनात खोलवर रुजावेत आणि हे पुरस्कार त्यांच्या जीवनात प्रेरणादायी ठरावेत.”
अशा उपक्रमांमुळे नव्या पिढीमध्ये इतिहासाबद्दल जागृती व राष्ट्राभिमान निर्माण होत असल्याचे मत उपस्थित मान्यवरांनी व्यक्त केले.
