महाराष्ट्र लोकसेवा आयोग (MPSC) वतीने घेण्यात आलेल्या उद्योग निरीक्षक (Industry Inspector) परीक्षेत राज्यात तिसरा क्रमांक मिळवत शिरूरच्या चेतन दत्तात्रय बर्गे यांनी शहराचा गौरव उंचावला आहे. या उल्लेखनीय यशामुळे शिरूरमध्ये आनंदाचे वातावरण पसरले आहे.
चेतन बर्गे हे शिरूर नगरपालिका येथे सॅनिटरी इन्स्पेक्टर पदावर कार्यरत दत्तात्रय बर्गे आणि शिरूर शिक्षण प्रसारक मंडळ येथे कार्यरत अनिता दत्तात्रय बर्गे यांचे चिरंजीव आहेत.
चेतन यांचे प्राथमिक शिक्षण जीवन विकास मंदिर, शिरूर, तर माध्यमिक शिक्षण विद्याधाम प्रशाला, शिरूर येथे झाले. पुढे अभियंता बनण्याच्या ध्येयाने त्यांनी सिंहगड कॉलेज ऑफ इंजिनिअरिंग, वडगाव (पुणे) येथून पदवी पूर्ण केली. अभियांत्रिकीचे शिक्षण, नोकरी आणि राज्यसेवेची तयारी यांचा समतोल राखत — मर्यादित साधनसामग्री, कठोर दिनक्रम व सातत्याने अभ्यास यांवर त्यांनी भर दिला आणि आज राज्यात तिसरा क्रमांक मिळवत परिश्रमाला मुकुट चढवला.
कष्ट, शिस्त आणि शिक्षणाची प्रेरणा घरातूनच मिळाल्याचे सांगत चेतन म्हणाले,
“अभ्यासाचे नियोजन, शिस्त आणि ध्येयावर अढळ विश्वास असेल तर कोणताही विद्यार्थी स्पर्धा परीक्षेत उत्तीर्ण होऊ शकतो. स्पर्धेच्या तयारीबरोबर करिअरचा पर्याय तयार ठेवणेही तितकेच आवश्यक आहे. ग्रामीण भागातील विद्यार्थीदेखील यशस्वी होऊ शकतात, त्यासाठी संधीपेक्षा तयारी महत्त्वाची आहे.”
शिरूरमधील वाढत्या औद्योगिक वातावरणाच्या पार्श्वभूमीवर उद्योग प्रशासन क्षेत्रात युवांसाठी प्रेरणादायी ठरणारे यश म्हणून या कामगिरीची नोंद घेतली जात आहे.
चेतन यांच्या या कामगिरीबद्दल मित्रपरिवार, शिक्षक, ग्रामस्थ यांच्याकडून कौतुकाचा वर्षाव होत असून शिरूर नगरपरिषदेचे मुख्याधिकारी प्रीतम पाटील यांनी अभिनंदन करून त्यांच्या पुढील कारकिर्दीस शुभेच्छा दिल्या.
